pgview
/CheckIfDuplicatedEmail
/Lang
image
image

梁嘉琪

飾演阿琪,士多太子女。生性樂觀,一直渴望出外旅遊見識世界,因繼承父業而被困於士多內。旅遊書是她與世界接軌的唯一方法,最後因他人的鼓勵下踏出放眼世界的第一步。

屋邨出生的嘉琪,對於南山邨的眼前景物,倍感親切。「好似我哋拍嘢個攀架,我哋會創作咗好多遊戲,例如「捉依因」,自己設計規條上去幾個小朋友一齊玩。以前呢啲屋邨有好多空地,我哋就會一齊玩踩雞腳、伏匿匿……我覺得我哋嗰時嘅好玩,唔係因為有啲乜嘢玩具,而係幾個小朋友聚埋一齊,我哋自然會創作到好多遊戲一齊去維繫感情。」

共同回憶 保留情懷

拍攝《香港遊樂團》時,她有與屋邨街坊聊天,「同佢哋傾偈都會有好多話題」。她認為士多既是一班人共同擁有的回憶,也是凝聚大家的一個中心點,有保育的需要,並希望可以將這個凝聚力帶給下一代,「除咗係歷史之外,會見到前人點樣去令佢進步,其實呢啲情懷我哋都好需要去保留」。

自稱較少跑步的嘉琪,身邊卻不乏跑友,「身邊好多朋友鼓勵我一齊跑,朋友話如果壓力好大或者唔開心時,可以透過跑步去抒發自己,當你一跑步之後會上癮,跑步之後,個毅力同為自己打氣嘅能力會增加」。

對於這次為專為病童服務的Lifewire拍攝活動宣傳電影,她也想起家中有長期病患者,很明白照顧長期病患的感受;體會到無論精神上及體力上,病者及家人,都需要給予支持。

image

周國賢

飾演阿賢(阿樂胞兄),與自閉症弟弟相依為命,背負着很多責任,甚至為弟弟犧牲自己的感情生活。

周國賢(Endy)指身邊有朋友跟戲中兄弟相似,弟弟因無法面對外界而躲在家中,而哥哥則每天拼命工作。哥哥雖背負很多責任,但不想他人擔心而默不作聲,所以揣摩角色時亦有參考對方。

剷光頭爆喊掟爛電話

「試過剷光自己個頭、打枕頭,掟爛電話……」幾年前,Endy懷疑自己患上抑鬱症,生活飽受情緒困擾,「有段時間對身邊人嘅情緒好敏感,睇到人喊,自己都想喊,有時反鎖自己喺房喊……」Endy後來透過閱讀心靈書籍,發現這只是都市病的一種,深感在城市生活的人或多或少都有情緒病。

Endy提及自己當時會突然爆發,皆因為去到臨界點卻沒找到出口,「其實壓力爆煲,一定要搵方法,尋求正常窗口將情緒爆發,例如喊!唔好想喊都逼自己唔好喊,唔開心可以聽一些感動嘅歌,讓自己情緒健康地發洩」。

跑步深呼吸健康減壓

Endy覺得最健康的減壓方法是運動,而最短時間達到減壓效果的就是跑步。另外,他指深呼吸的效果也很好,「都市人有咁多呼吸疾病,大部份因為忘記深呼吸,每個呼吸用半分鐘至一分鐘,其實很舒服。」

港人拍嘢唔拍番香港

提到本土情懷,Endy覺得香港屋邨有獨特的文化氣質和氛圍,在其他國家找不到,「好多外國攝影師或導演都會嚟香港取景,拍出來好靚。但點解香港人自己拍攝冇用番香港,下下都要去外國」。他盼望港人善用香港的特色建築,「未必要去外國名勝古蹟,香港都有好多自己嘢,只係世界太快,冇好好享受身邊嘅事」,若申請容易的話,他希望日後的MV拍攝都以香港為首選地點。

Endy反覆強調香港有很多未被發現的靚海灘,「但我唔可以講,唔係會突然好多人去,我冇咗我嘅秘密後花園。」說罷,Endy自顧偷笑。

年底個人大型演唱會

Endy表示上半年除參與電影和戲劇拍攝,亦忙於幫朋友寫歌及監製,發現忽略了自己的音樂。所以下半年會慢慢重拾自己的音樂工作,繼續專注寫歌及籌備新專輯,不過暫時未肯定是EP還是專輯,因為同時也在積極準備新Studio。最後Endy預告,計劃於年底開辦個人的大型演唱會。
image

湯怡

飾演阿怡,善良可愛,自小因美貌而獲得不少好處;長大後工作卻經常碰釘,最後在子樂的正能量支持下而重拾笑容。

「我其實非常之強同比較粗魯!哈哈哈……」湯怡說這角色的性格跟她本身有很大反差,因此須時揣摩拿捏角色。
屋邨長大的湯怡,也有不少童年回憶,「每日放學一定會到公園玩,我好鍾意玩跳飛機」。一向喜愛食甜品的她,自小特別鍾情龍鬚糖,她感嘆:「宜家香港都越嚟越少見得到呢類香港情懷嘅嘢。」

別看湯怡一身「馬拉松」裝扮,她坦言以前不喜歡跑步,因為怕辛苦,「呢幾年跑步之後我覺得反而係好輕鬆嘅事,對身體好之餘,對情緒放鬆幫助好大,有時工作壓力嘅問題,跑完步會開心好多」。

問及有否與男友洪卓立一齊跑,她甜絲絲地說:「佢間中都會跑,不過佢鍾意踩單車多啲,有時我陪佢踩單車,佢陪我跑步,當拍下拖囉!」

經歷生死 珍惜對方

「好似所謂經歷過生死咁,大家特別珍惜對方!」早年洪卓立肺積水入院,湯怡憶述當時身心疲累,「佢出院後我開始學煮飯,因為出面嘅味精比較多、自己煮一定健康啲,所以我開始學煮飯,我覺得健康係非常重要,嗰次令我體會到真係要珍惜身邊嘅人」。

跟男友維繫多年秘訣?「大家都好宅!哈哈……」湯怡說可能大家性格上非常夾,而最重要是信任,「因為始終做呢一行,出嚟做嘢如果大家冇信任係好難維持關係!」

自言非常眼淺的她,曾為探訪病童而痛心,「我覺得佢哋係非常之需要我哋嘅幫助,可能我哋出小小力,可能搞一啲慈善活動去籌款,幫助佢哋,俾佢哋知道原來身邊仲有我哋陪佢」。
image

麥子樂

飾演阿樂(阿賢胞弟),患有自閉症,從跑步尋回自己的世界。

專注自己思想

「其他人同我講乜我都唔會理!」為演好是次角色,麥子樂逼自己「乜嘢都唔諗,只諗自己想諗嘅嘢……」他不諱言這是頗困難的一件事。麥子樂曾飾演類似角色,當時為揣摩角色試過跟自閉症小朋友交流,亦有跟他們的家長溝通。他覺得自閉症患者大多活在自己世界裏,所以演出時要完全專注於自己的思想。

麥子樂提及友人的兒子也有自閉症,他曾嘗試耐心跟其溝通,了解其想法,「要嘗試畀耐性去了解佢地點解會咁樣,同埋要多關懷」。

跑步鍛鍊意志

麥子樂自言經常跑步,因為可以鍛鍊意志力。他認為許多香港人都精神緊張及壓力大,跑步是其中一種可令人放鬆、又適合推介給不同人的運動。而且因身邊有朋友互相激勵,大家為同一個目標而跑,「今次跑呢個時間,下次跑呢個時間」,就能更堅持下去。

電車帶來戀事

提及最有感受的本土事物,他鬼馬地說最喜歡電車,「電車通常都係追女仔嘅故事!」他的那些年,就是每日在電車同一時間遇上鄰校女神,「最後都鼓起勇氣拎到電話!」

是次微電影主要圍繞屋邨拍攝,麥子樂自言雖不是在屋邨長大,但小時候常到屋邨遊樂場玩耍。他表示很渴望在屋村長大,「感覺似一個小社區,大家好團結,鄰居會互相幫忙,羨慕那種守望相助感覺」。
image
View Comment (0)
You must be a logged in contributor to comment.