pgview
/CheckIfDuplicatedEmail
/Lang

 

 

「超級奶爸」,成為家長界近期的熱話,藝人何基佑(Kay)以育兒課程導師身分,於真人騷節目《超級奶爸》以「不打不鬧」的正向方法,協助家長糾正子女的不當正為。


不過,所謂「能醫不自醫」,Kay在教導他人之同時,面對2歲半的兒子,又能否狠下心腸,恩威並施地管教呢? 

 

不心軟 管教要堅定


「我係一個好嚴嘅爸爸。」Kay所言非虛,即使面對着萌萌的「清義哥」,他也絕不「手軟」,「畀咗指定時間食飯,食唔晒,畀多個機會你都唔食,我就倒」、「叫佢企定定食下午茶,佢一行開,我就倒」、「新玩具玩咗唔夠8個鐘,貪得意放落垃圾桶,我就抽起垃圾桶丟出街」
 
Kay認為「不心軟」才可令小孩自律、建立正面行為,讓他們知道甚麼是適切的後果,「小朋友『賴皮』唔食飯坐一、兩個鐘,你同佢『磨』,咁唔得嘅……沒收佢嗰餐有乜嘢問題?佢唔食呢餐會唔會死?!」

他篤定小孩若感到肚餓,下一餐便會乖乖吃飯,即使孩子哭得死去活來,只要父母夠堅定,不屈服於小孩哭鬧之下,管教孩子自然事半功倍。

 

image

 

做得到 更要做得好

Kay憶述曾遇上相當棘手的個案,該名2歲小孩自10個月起就玩手機,吃飯必要「電子奶嘴」,從未能如常用餐,Kay決定使出「唔食就倒」招數,加上父母堅定執行,令這名2歲童迎來180度大改變,「他由要人餵、食近乎流質嘅嘢,仲要睇手機,去到可以坐定定自己食晒成餐,令人好振奮!」

Kay強調竅門是「要信佢都係一個人,佢有自己嘅需要,佢自己有方法去滿足,一條路行唔通,佢惟有用另一條路」。
image

 

他坦言,這種「不打不鬧」的育兒方式既正面且有效,節目中的小孩都能「改邪歸正」,暫未有失敗的個案,但他認為成功分好多種,「小朋友由『做得到』去到『做得好』,係要好長時間,好多時停留喺小朋友『做得到』,已經好滿足,但我永遠想佢『做得好』」。

 

image

 

有得揀 咁至係自由

然而,管教方法規條重重、限制多多,難免令人覺得小孩的自由被剝削,令他們喘不過氣來。Kay卻不認同,強調有規條才有自由,小朋友「有自由去揀」,「你有30分鐘食飯,食唔晒就收嘢。我哋畀佢揀,佢揀咗唔食,唔緊要,之後佢肚餓,然後就覺得頭先儍咗,第二日就會醒目,呢個先係最自由」。

「又例如我哋話玩嘅時候要禮讓要溫柔,唔可以打人,呢個都唔係乜嘢規條,但我哋畀佢揀,畀佢打人,但打人會有個後果,就係冇得玩,甚至要離開。」假若嘮叨、催促也是徒然,大可給孩子自由選擇,但一切後果自負。

不過,Kay提到有家長在教育兒女方面往往表現心急,期望短時間內處理很多不當行為,「小朋友食飯食咗半個鐘,又要人餵,又唔肯試其他新嘅食物。其實呢度係三樣嘢、三個問題,你想搞邊樣先?」他建議家長宜作取捨,先處理最想孩子改善的一環,由淺至深,對孩子作出簡單且明確的指令。

 

image

 

打與鬧 破壞親密感

「棒下出孝子」、「不打不成器」乃中國傳統教育觀念,惟Kay坦言體罰只帶來短暫效果,絕不鼓勵家長使用,「打永遠都係單向,邊個大力、邊個大聲,就邊個話事,係由父母主導,小朋友基本上冇say。小朋友會覺得你打佢唔係因為佢做錯,而係你憤怒」。

一出手隨時留恨,因為打罵過後,子女對父母信任全失,「親密感需要好長時間建立,但可以好快被破壞」。

 

image

 

忙到死 都要陪仔女

集主持、司儀、歌手、演員於一身的Kay「百足咁多爪」,但他卻活用每一個親子時間,「九成半時間我都送到佢返學、接到佢放學。都幾緊要,特別係放學,你可以第一手資料知道佢今日發生乜嘢事、開唔開心,有冇啲嘢好難忘,見到佢個反應。小朋友會好開心,有爸爸媽媽接放學,佢會好滿足」。

工作不定時的Kay,每個早上都會陪清義哥食早餐,看3至4本書和玩耍;他明白到時下父母工作忙碌兼工時長,「但我鼓勵佢哋放工點都抽少少時間,睇本書、瞓覺前講個故事,玩15分鐘」。因為伴讀及親子活動,可有效促進彼此關係。

 

image

 

Kay特別提到「睇繪本」的益處,「繪本嘅特色係多圖少字,故事顯淺但講到複雜嘅道理。每日盡量睇3、4本,可以建立親密感,又可以認字,或者提升佢嘅自理能力」。
 

 

 

齊管教 勿分軟或硬

很多父母都愛扮演一軟一硬的天使魔鬼角色,但Kay認為這方法並不可取,「咁樣對『硬』嗰個好弊,佢唔討好,好難同小朋友建立親子關係;『軟』嗰個亦都有機會永遠被欺負」。他認為父母的立場必須永遠一致,可避免小朋友耍古惑招,「唔會諗一個唔得,另一個會得」。

 「太太好好,同我一齊上堂,佢知道管教理念,如有爭議,以我為準。」但太太Charis也有心軟時,「佢見到我好嚴,會有少少心軟,但奈何講咗係咁就係咁,我喺管教小朋友上係幾硬淨」。

不少家長協議將管教責任交託給較空閒的一方,甚至交給工人或「四大長老」,但Kay認為管教是需要父母一同執行,否則管教步伐不協調,難以改善孩子的不良行為。

 

image

 

《超級奶爸》演活HOPE-20

HOPE-20 教兒樂家長培訓課程®是由「羅鷹石慈慧基金」轄下之「慈慧幼苗」贊助,由香港理工大學和香港大學於2013年研發,專為育有2至3歲子女的家長設計,教導家長管教兒童的方法和技巧,Kay完成課程後更成為其中一位導師。

不過他卻沒有「開班授徒」,「作為傳媒人,用另一種型態去表現呢樣嘢,可能會有更多人知道同受惠」。於是成就了《超級奶爸》的誕生。

《超級奶爸》以真人騷手法記錄及呈現現代父母經常遇到的子女行為問題,拍攝父母如何束手無策,並在Kay的幫助下,以不打不罵的方式管教小朋友。
 
「好多人留言畀我話『work喎』、『好好喎』,聽番都係非常正面,佢哋會好感激你,『原來好簡單,冇同佢(小孩)講清楚想點,佢就冇做到,講咗就冇事』。」

 

打韆鞦 瀡滑梯 好處多?


勤有功,戲無益?其實帶小朋友到公園或遊樂場玩的好處多得很!Kay指出「玩」有助小朋友感覺統合及肌肉的發展,甚至感官上的刺激,「好似打韆鞦、瀡滑梯,對於佢身邊嘅事物、空間感嘅反應、發展,都有好正面嘅幫助」。如父母願意參與其中,更能建立親密感。

 

image

 

而且小朋友在公園能接觸到其他小朋友,能讓他們互動、溝通,會慢慢產生一些規律和秩序,甚至令從他們在碰撞中學懂處理衝突。

 

兒子大過天?夫妻相愛緊要啲!

Kay一家三口相處融洽,秘訣是「夫妻要相愛」。Kay認為夫妻相愛才能為小朋友豎立榜樣,讓孩子覺得這個家穩定、安全。而孩子絕非家庭的中心,「唔係小朋友一出世就擺晒注意力喺佢度,然後唔理對方,因為小朋友會大,會離開自己,最尾剩番你同你嘅另一半,嗰段路你係要再走落去」。

 

image

 

管教攻略

預早協定:預早和孩子溝通,說出期望孩子表現的正面行為
冷靜區:當孩子情緒失控,送他到一個角落讓他冷靜
隔離區:當孩子有變本加厲的不當行為,便進行隔離
終止活動:終止孩子正在進行的活動或遊戲,或離開活動的範圍
撤去享受:撤去孩子每天應有的東西,如飯後甜品、遊戲時間
故意忽視:應對孩子搗蛋引注意,及滋擾性行為
自食其果:孩子為自己的不當行為付出代價
 

神奇寶貝檔案                                              

名字:何清義(清義哥)
屬性:性急
技能:不厭其煩係咁chur
必殺技:「我要呢個我要呢個」loop100次
Kay應對絕招:故意忽視──「我好忍得你喊,我冇所謂,總之我點樣都唔會畀你。」

 

 

 

採訪及撰文:梁劍紅、莫雅瑜
編審:梁劍紅、王煜棋
硬照攝影:Cory Cheung
影片製作:Lifewire、Sam Chan、Cory Cheung

*《超級奶爸》由慈慧幼苗出品,ViuTV製作

View Comment (0)
You must be a logged in contributor to comment.