曾經的不孝兒 - 許毓青
如果，人生是一場戲，他的戲份，絕對是終極挑戰；
年少輕狂、人生高峰、四肢癱瘓、求死不能，爸爸患癌逝世……
換作是你，會否立即辭演？
惟有他，咬緊牙關，落力撐下去……
此刻，輪椅上的他只寄望陪着媽媽，返鄉到爸爸墳前，說聲對不起！
「有事業又見到心儀嘅女仔，覺得自己係好幸福嘅男人！」片段回到2002年的大年初五，許毓青回鄉與爸媽過年並「相睇」；女孩為專業人士，兩人一見如故，他更決定摒棄過往愛夜蒲揮霍無度的自己，準備成家立室。
豈料，兩天後，高速公路的一場車禍，他的美滿人生隨車一起雙雙跌落谷底。從此頸椎神經嚴重受損，胸口以下完全喪失知覺及活動能力，「完全郁唔到，變咗全癱人士！幸福咗兩日之後所有嘢都冇晒！」
|
人生歸零 求死卻不行
「想死！醫生點解要救我？！」癱臥床上不能自理，他形容自己像木乃伊。「轉身都唔得，飲水、搲痕…所有嘢都要爸媽幫手做！」「好灰！好記得醫生講話你以後都要瞓喺張床…但好可悲連死都死唔到，跟住選擇咗逃避收埋自己，完全唔理任何人，包括爸媽。」
意外後，爸媽不分晝夜全天候輪流照顧，做8小時運動、半夜幫他轉身拍背、兩老更將當時180磅的毓青由房間抬到廁所，每天無間斷服待他沖涼及大小便，無微不至，即使身體不適也沒吐半點苦水，無怨無悔的繼續照顧及給予鼓勵。他們更傾盡積蓄、四出借錢為兒子醫治，一時間欠債廿多萬。
|
「你去死啦！」粗口報親恩
他不但沒半點感激，更常遷怒於爸媽，「『你去死啦！』好多粗口，極不孝嘅說話……」不堪回首，毓青深刻記得父母當時的表情，「係好心噏，但唔可以鬧我，又唔可以做到好唔開心，要強顏歡笑繼續做。」
兩年過去，爸爸終忍不住開口：「『你可唔可以唔好咁樣「pair」落去』……我完全唔騷佢，佢好無奈行返出去，第二日開始飲酒……」爸爸努力勸勉，但眼見兒子依然自暴自棄，不瞅不睬，開始酗酒度日，麻醉自己。「飲飽佢飲死佢囉，關我咩事？！」爸爸每天烈酒當水飲至身體出問題，媽媽懇求毓青勸戒，他還是冷漠回應。
父燃燒生命 讓兒子重生
一天，爸爸突倒地不起，送院後證實因長期過度酗酒，酒精肝中毒，令神經麻痺，致雙腳不便，終以拐杖走路。自此，照顧毓青的責任便由媽媽獨力承擔；她因常抬着毓青出入，致手筋受損，雙手險永久殘廢。
「我見住爸爸好想爬起身，當時我好想去嗌「爸爸你點呀？」但我冇嗌到，嗰時我流晒眼淚，掩住個口驚佢見到我喊，跟住佢爬去一個我見唔到嘅地方。」
自我封閉兩年，爸爸的倒下，反令毓青有所頓悟，「我以前咁對你哋，點解你哋仲可以咁對我？我收埋逃避兩年得到啲乜？搞到爸媽身體越來越差，我開心咩？呢條路唔得，會唔會諗第二條路行呢？」自我反省後，他決心努力改變心態，嘗試聽爸爸話，做運動改變自己的活動能力。
「雖然好痛，但諗到爸媽，兩老咁多年為我承受咁多痛苦，呢啲痛算係乜？！我仲未死，不斷練習咗兩個月，開始叫做喐到，就試下玩電腦，洗面、刷牙，盡量減輕爸媽的負擔！」
|
第一次出街 全不敢抬頭
其後，路向四肢傷殘人士協會的義工邀請他一起踏出社區；意外後首次踏出家門，「我淨係低頭完全唔敢望任何人。」惟毓青抵酒樓首遇一班輪椅同路人，啟發油然而生。「佢哋有啲比我嚴重得多，有人得個頭喐到，其實自己都唔係咁差，點解人哋做到我做唔到？有少少衝動想行返出嚟社區，為社會做多啲嘢。我最想返內地幫助山區小朋友，呢個係我最大嘅夢想！」
「我哋傾多咗偈，仲會互窒。」當毓青不再自我封閉，與爸媽的關係更日漸深厚；也許過份勞累，爸媽去年先後確診食道癌。笑着的毓青難掩內疚：「我以前冇孝順過、冇好好對佢哋，希望喺有限的情況，做到仔女應做嘅嘢。」
子欲養而…… 有心唔怕遲
「做就即刻做，點解要等？」毓青爸爸去年父親節當天離開了，他更體會「珍惜當下」的重要。「以前朋友都問我唔使返屋企陪爸媽咩？我話有咩所謂，你估我咁快死咩？當受傷後，咪趕唔切囉，坐咗輪椅後，你又做到啲咩呢？」
錯過很多，不能失去更多。毓青盼望與媽媽回鄉，拜祭爸爸並承諾孝順媽媽，「呢個會係人生中我同媽媽嘅美好回憶。」他嗟嘆：「爸爸在生時一齊做咪幾好，?家好似遲咗一步，但識得返轉頭咪得囉……」回鄉拜祭，像是微不足道；而然，坐着四個轆的他，攀山涉水十多小時回鄉談何容易？！其實，只需租用一輛能同時載健全人士及提供升降台予輪椅人士的復康車、及點點的旅費即能解決，你願意助毓青達成這卑微的心願嗎？
|
