湊兩個小朋友真係要有好好嘅時間管理，細佬4個月大喇，開始越來越穩定，我可以安心咁陪沛沛去拍拖玩下。
今次一個活動滿足咗我同沛沛好多嘢呀！聽故事、畫畫、煮嘢食、學習表達情緒、學講故事……仲做埋慈善，因為活動收益會捐畀「書伴我行（香港）基金會」推廣親子閱讀。
應該好多家長都認識菜姨姨，佢講故事我都好鍾意聽，菜姨姨分享咗一本叫《害羞的芋頭》 嘅故事繪本，同大家一齊延伸好多有意思嘅思考同討論，之後小朋友畫畫創作配合自己性格嘅菜式，又有導師教小朋友煮「芋茸煎軟糕」，同一時間家長又可以聽菜姨姨教講故事嘅技巧，真係好perfect嘅session plan，故事 X 烹飪親子平衡小組。最後當然係食沛沛整嘅傑作，yummy！！
透過故事、動手參與嘅體驗式學習，真係好適合小朋友，好快可以將抽象難明嘅道理、價值觀種喺小朋友心裏面。沛沛一路食芋茸煎軟糕一路同我講：「芋頭雖然外表唔靚，但係其實好有價值㗎！」
