「全部都係我盲摸摸自己摸索出嚟，所以我全部都鍾意。」難以從足球評述、主持、演戲中取捨出最愛的强尼(許博文)，當年毅然放棄建築界的高薪厚職，投身演藝圈追尋夢想。30歲由零開始摸索新路向，這份勇氣讓他逐步在不同領域解鎖更多成就，在多重身分之間切換自如，親自評述出最精彩的人生球賽。

走進充滿香港情懷的訪問場地，強尼看見老闆珍藏的任天堂紅白機，便禁不住打起「超級瑪利奧」來，打到肉緊時，更大叫一聲。

「喺我個年代，男仔來來去去都係玩嗰啲，冇得上網，冇機打，咁咪一係踢波一係打籃球。」曾是甲組足球員的父親，從小帶他與弟弟踢波，引領他走進足球世界，也為他日後的講波事業埋下伏筆。

命運：工程師→藝人

在很多人眼中，強尼還有另外一個稱號：「全尼」-- 因爲從講波入行、到擔任主持、演戲、出書、甚至音樂劇，堪稱全能。但在30歲前，他其實是一個脚踏實地的建築工程師。

「細個我的志願成日都變，都係有啲隨波逐流feel，冇一個好特定嘅夢想。」喜歡踢波時，想過做足球員，又想過做律師。「細個有冇諗過做幕前？絕對冇。」

「我諗我係有少少跟住命運安排去行，佢有咩機會嚟，我就做乜嘢。」看似沒有特定目標，但其實要預先做好準備，才能在獲得命運眷顧時，好好發揮。強尼按着自己的節奏和安排，穩穩地做好眼前目標。

「譬如我鍾意踢波，我可唔可以入到大學個足球隊呢？」「譬如我鍾意唱歌，我可唔可以參加校內歌唱比賽，甚至代表學校出去聯校比賽？」當一個短期目標達成後，再定立下一個目標。

表演慾建立自信

强尼笑言自己中學時代頗有表演慾，「我哋呢啲喺男校讀書嘅人，在雄性嘅世界，想成為人哋關注嘅人」，踢足球、參加歌唱比賽，是成長階段尋找自我價值的方法。

校內的歌唱比賽大約要起碼中三才可參加和觀賽，「到你夠年紀，中三四入到去睇喇，你就會想上台做唱嗰個；上咗去唱時，你又想做贏嗰個。」但他也只當作是一項課外活動，「譬如一個鍾意編織嘅女孩子，我諗佢未必諗『我將來出嚟要全職編織』。」

「喺我個年代，要成為一個歌手係一件非常遙遠嘅事」，當年電視台每年宣傳「新秀歌唱比賽」，領取報名表格的禮頓道1號華星唱片公司，對當時的強尼來說，像是一座高不可攀的山。「我係每年都唔會夠膽去攞表囉，因為我覺得係冇可能嘅事。但其實點會冇幻想過？冇閃過(念頭)？」

「脚踏實地」的另類解讀

他說以前會形容自己這是腳踏實地，不好高騖遠，但近年出書回首細味，他有另一番解讀：「我諗我應該係一個唔敢失敗嘅人」，「我係一個比較膽怯嘅人，我唔敢面對同承認：我做唔到、我失敗。只要我一日唔做，我就無失敗過。」

加上當時還有其他選擇，「其實你可以讀書、你可以踢波」，「咁你係學生，一個好主要嘅責任咪讀書，讀書就揀讀咩科啦，咁我就揀建築，咁所以出嚟就係做建築。」

畢業後投身建築界十年，强尼坦言自己喜歡這行業，有滿足感，也沒想過轉行，「我覺得能夠起樓係一件了不起嘅事。我諗過第時老咗，帶個仔經過時話：呢棟樓老竇嗰陣有份做。因爲我覺得(建築物)係一啲可以留低嘅嘢。」

工作模式亦符合他「坐唔定」的性格，「通常一個project長則三年短則兩年，之後又會去下個project，面對一班新嘅同事、一份新嘅圖則、新嘅難題，我好鍾意咁樣兩三年就轉一次工作環境。」

命運的轉捩點總在不經意間出現，29歲那年，強尼偶然在電視看到招募足球評述員，腦海中閃過「就30歲喇喎，而家唔試好似第時冇機會試㗎喇」。雖然他從沒想過講波，「只不過機會突然出現，不如我試咗面前呢個機會先。」於是，這封改寫人生的應徵信就這樣寄出了。

無師自通 摸索定位

强尼最初以兼職形式入行，笑言最難忘的是電視台沒有訓練，「即係藝員訓練班有訓練，我哋冇呀，casting揀咗四個人，得啦，聽日出鏡」，亦沒有資料稿，「講波從來都冇稿，體育係Live，你點知跟住落嚟會發生咩事。」

自言從小擅長與壓力共存的他，要兼顧從零開始的兼職和工程師正職，卻不太感覺有壓力，「因為我做緊自己好好鍾意嘅嘢」，「好enjoy去做呢件事。」

「講波係冇得學，冇一科係讀講波，講波就係你對足球有幾多認識。」自問沒有職業足球員的專業角度，強尼於是努力刨資料；由最初「坐喺度可能成粒鐘講唔到兩句嘢」開始，不斷努力鑽研，終於找到自己的定位：「為觀衆帶來娛樂和資訊的足球評述員」

30歲的「捨」與「得」

在轉行追夢的途中，本已升至project manager的强尼學會一個詞：「捨得」。「一定要捨棄一啲嘢，你先會得到啲嘢，呢個係必然過程。」爲了講波，他捨棄了夜晚留在家中的時間，捨棄原本在大部分人眼中那份穩定、有明確晉升機會的穩定工作，「講波就係講波，演員就係演員，主持就係主持，講波冇升職㗎，一生人你都冇得升職㗎。」但他仍然決定放棄理想收入，全身投入新工作--轉做全職「講波佬」。

當時強尼給自己三年時間嘗試，如果三年後能賺到建築行業時的八成入息，便繼續走下去，否則回歸本業。他十分感恩家人、朋友同學支持自己跳出舒適圈追夢。

「我好幸運」

從講波開始，經過多年臨場發揮的鍛鍊，到做主持、拍劇演戲，甚至做音樂劇、出書，強尼涉獵的範圍越來越廣，如果一定要選一個最喜歡的崗位，他的答案是：全部都鍾意。正如他喜歡建築業的原因一樣：「我就係鍾意佢多樣化、唔單一。」更重要的是：「全部都係我盲摸摸，靠我雙手摸出嚟，咁點會有一樣嘢係我唔鍾意呢？」

他肯定地說：「我絕對覺得我係一個幸運嘅人。」他說能夠在這個行業工作已是一件幸運的事，「其實呢個行業係你完全冇得主動想唔想繼續，全部都係被動，所以我覺得係好好彩。」

讓兒子走出自己的路

小時候的強尼看見電視劇總是「子承父業」，曾疑惑長大後是否也要跟隨父親的步伐做甲組足球員、做銀行，「我記得我細個對住我老竇講咗啲好戇居嘅嘢：『我第時大個唔想做銀行』。」

「當你𡃁仔好幼稚嘅時候先會咁諗，但我老竇係成年人，佢知道個世界唔係咁運作，佢知每個人有自己嘅人生路。」

他把這份不設限的觀念推展到兒子身上。如果兒子也想做幕前工作，强尼直言「我一定冇所謂，如果佢想做咪做囉，我會嘗試睇下點樣可以幫到引導佢。」

他認爲現今世界的運作模式每日都在變，笑言「咁調返轉喺我阿爺眼中，我個世界都同佢好唔同」，世界在改變，人也要隨着轉變，不能以舊模式限制下一代。

區分「辛苦」與「攰」