外出吃饭、看电影……平常的家庭乐，但对Carmen一家四口来说，却似是遥不可及的奢想……只因她有一个患上自闭症的儿子。

3岁半的炫匡相当好动，表情多多，兴奋时会手舞足蹈，甚至突然尖叫，「佢好钟意睇会转嘅嘢，玩火车（玩具）可以好专注，自己玩一个钟。初时以为佢好好凑，唔使理佢……」

「佢唔讲嘢，单字都唔讲，只系『咿咿呀呀』讲BB话。」妈妈Carmen初时还以为炫匡与8岁哥哥一样有学习迟缓，「哥哥系正常小朋友，都系2岁半先讲单字，之后一爆就爆到去句子」。

唔望人 活喺自己世界

岂料，「1岁半去健康院检查，医生话佢唔望人，活喺自己嘅世界，2岁半确诊有自闭症」。Carmen回想那一刻，「（脑海）空白一片，眼泪系咁流，去见医务社工排S位（特殊幼儿中心），但社工讲乜，我完全听唔入耳」。

面对孻子患病那种锥心之痛，Carmen只能选择背人垂泪，「等两个小朋友瞓晒觉，我就喺房度喊」。幸得丈夫支持和鼓励，心情总算逐渐平復，「佢话不如开心啲去面对，积极啲搵帮助，会唔会搵啲playgroup畀佢学习下群体生活」。

抹干眼泪、认清事实，Carmen决心上网搵资料帮助爱儿，最终让她找到一间专门协助自闭症儿童的慈善机构，还可以让炫匡免费接受治疗一个月。

「第一次叫我做妈咪！」

「（炫匡）3岁之前唔识讲嘢，最多只系识讲哥哥……（治疗）一个礼拜左右，我去接佢放学，佢行出嚟同我讲『妈咪！』嗰一刻好开心，就嚟三年，第一次叫我做妈咪。」Carmen忆述那一声「妈咪！」，还禁不住带点激动。

「嗌妈咪」只是炫匡进步的起点，「爸爸、车车、饼饼，自己叫乜嘢名、住喺边，有几多兄弟姊妹都识得讲，没谂过会进步得咁快」。

说话虽不算多，但炫匡活泼爱笑，採访期间，他专一地不断玩滑梯，完全地自得其乐，之后又跟妈妈一起踢波，笑到「卡卡声」；然而，当他遇上不合意事时，情绪亦会随时大逆转嚎哭「扭计」。

「你个小朋友好嘈呀！」

Carmen坦言，炫匡较之前已有显着改善，过去曾遭受过不少旁人的目光、埋怨……「搭车遇上塞车，佢没耐性就会叫。试过喺巴士度俾人话：『你小朋友好嘈呀，可唔可以叫佢唔好咁大声呀！』」

又试过到餐厅食饭，「佢唔钟意就会大嗌，嗌到成间餐厅嘅人都知道，跟住我就成为焦点，俾人望住」。因为这种担忧，Carmen从未试过带两个儿子到戏院看电影，「我唔敢呀，变相连哥哥都没得去睇」。

但Carmen从不怪别人，只希望大家对自闭症多一分了解，少一分误解，「普通小朋友『由一到二』可能好快，一日就可以；但自闭症小朋友可能要教10日，会有个过程，希望大家包容」。

「细佬自闭症大晒咩！」

「点解你成日睇住细佬，没时间陪我，你锡晒细佬、就晒细佬……细佬自闭症大晒咩！」8岁的哥哥，其实痛锡弟弟，平时最爱黏着玩耍，但当父母将注意力都投放在弟弟身上时，哥哥纵使心里明白，但难免有些「呷醋」。

「其实佢都系得8岁，我明白嘅。」Carmen难掩心中的内疚，「炫匡去中心上堂，变相哥哥要自己去补习社，自己放学」。她理解哥哥的不满，于是细心解释弟弟有特别需要，「我成日同佢（哥哥）讲，你哋两兄弟要相亲相爱，细佬渣少少，你要帮助佢」。

庆幸哥哥懂事，即使屡次被炫匡抢玩具而大动肝火，两兄弟甚至爆发「骂战」，但Carmen眼中，两兄弟的感情还是相当要好。

训练费昂贵 盼获支援

目前，炫匡也有使用政府提供的免费到校学前康復服务，惟Carmen觉得成效不彰，「一个礼拜得一堂，（训练）半个钟，没乜显着进步，靠喺屋企继续同佢训练」。

想到将来，Carmen的脑海更充满问号，「唔知佢会唔会进步，唔知佢可唔可以照顾到自己，我都会百年归老㗎嘛！」

望着眼前的炫匡，Carmen希望他长大后能帮助更多自闭症患者；但面对目前，Carmen的愿望却更简单，「我净系想佢放学出嚟话畀我听，今日喺学校发生乜嘢事、有乜嘢趣事同我分享」。

Carmen明白到，要完成此简单愿望，只有一个途径，「自闭症小朋友真系需要好多钱去做训练，语言、小肌肉、大肌肉，全部都要做，要7,000至8,000蚊一个月，真系afford（负担）唔到！」她希望政府提供更多支援，帮助自闭症儿童家庭。

你，愿意伸出援手，为他们出一分力吗？

循序渐进 重复练习

炫匡进步神速，因为提供治疗的爱培自闭症基金用上应用行为分析学习法（Applied Behavior Analysis，简称ABA），是将一组复杂的命令，有系统地拆成简单步骤，一步一步、循序渐进，使自闭症患者能够逐步跟从；提升他们的学习动机、沟通、语言、社交行为，认知能力；并透过奖励激发他们的学习动机。

行为分析监督主任刘彦嫺（Quincy）表示，当炫匡能讲到一句完整句子，就会提高练习要求，「我哋沟通会望住人，佢哋讲嘢会咁样（左顾右盼），然后话『我要个波』。所以我哋练嘅时候要有诱因，等佢有动机望住我。佢真系好想要个波，咁佢就会一路讲，等佢望住我嗰下就即刻畀佢，佢就会知道『哦，原来望住人先有嘅』」。

此外，机构还会透过其他小游戏训练他的记性、模仿能力、甚至安坐在位置上，而每一个训练都必须重复练习。

至怕外人「加把嘴」

行为分析监督主任刘彦嫺表示，与自闭症儿童相处最重要是包容。一般人会因为别人的社交期望而改变自己，他们却不会，「因为佢哋唔明白啲规矩」。

刘彦嫺又指，父母管教自闭症儿童时，最怕外人「加把嘴」，「好影响家长心情，家长教佢哋（自闭症子女）搣甩一啲固执性行为，家长都要坚持，但系外人唔知头唔知路讲咗一句，可能打乱咗成个月嘅训练」。

更多文章

透视罕见病：天使综合症　长不大的天使 带笑落入凡间

透视罕见病：雷特氏症(一) 不治症女儿 日復日退化 妈妈：等你说爱我

无力揹水樽 难阻飞翔梦