主持飲食節目、發展美容生意，還要帶着兩兒子經常母兼父職……藝人周家蔚（Janet）近期「百足咁多爪」。行程排得密密麻麻的她，從容面對，一句「我first priority(優先次序)係屋企先」，KO所有難題，完美演繹多棲媽咪角色。
要約這位大忙人媽媽做訪問，難度真的達十分。「聽日要飛」、「後日拍嘢」、「囝囝未放學」、「要接奶奶機」......好不容易約成了，「下晝要開會」、「夜晚老爺嚟食飯要準備」......訪問最終只能「涉」於中段兩個多小時在她的店舖進行。「等我化個快妝先！」不消15分鐘，從飯局趕來的她，如摩打上身，極速「埋位」。
又幕前、又生意、又要照顧兩兒子......究竟如何拿揑平衡？好奇的小編禁不住直進問題重心。笑着的Janet輕描淡寫「就算你幾忙，都係擺小朋友喺第一！」
「好落手落腳嘅先生」
「天明係一個好落手落腳湊嘅先生。」Janet坦言，維繫和諧一家，全賴與天明間的相互理解，協調分工。天明不時離港工作，家中的大小事務主要由Janet 處理，「佢唔喺度我就自己一個搏殺，佢一返嚟我就on relax mode...佢自己都好踴躍，我唔使講佢已經搶着來做；我哋配合得好好。」
Janet還向他們灌輸錢銀概念，「要俾佢哋知錢個概念係點嚟。你着緊嘅衫、開水喉啲水係點樣有、開燈點解會有電...我哋用完電要熄、水又唔好嘥。唔想佢哋乜都奉旨，攤開手就有。佢哋有時會話啲嘢係好貴，我哋唔好浪費錢啦！咁當然見到玩具佢哋唔會講呢啲，但要從細灌輸。」
「佢哋每日都有好多好窩心嘅嘢，細佬天真無邪嘅笑容，哥哥好細心好sweet：「媽咪I love you，我好錫你㗎...」摸下你個頭、又錫下你個面，係暖男。」說畢笑至心心眼的Janet不諱言，兩兄弟也有令人「嘔血」之時。
「自己忍住吞血啦！」
Janet指每天教兩兄弟做功課也很費神，更曾被老師投訴「慢吞吞」。「講真係嘔血，但我忍。捱到個關口就好開心！」她奉勸家長保持平和的心：「自己忍住吞血啦！」「唔好急、唔好迫佢，唔好等佢抗拒。耐性、EQ係好緊要。做功課啫！又唔係做啲乜嘢，唔好搞到好唔開心。其實最親嘅人你就對佢最唔客氣，講句說話可以好難聽；但佢係由一張白紙開始。由佢出世到而家都捱左咁多，日日換尿片餵奶都係咁，點解做功課又要咁忟？」
不少怪獸家長費盡心機，「塞爆」子女每天的行程，為子女鋪自己心目中的理想「康莊大道」。Janet不敢苟同：「嗰個係你嘅目標，唔係佢嘅目標。你要活嘅，你活自己嘅人生，唔好要佢完成你自己嘅夢想。小朋友係一個個體，佢嘅人生要俾佢自己去行；唔好咩都安排晒。」
「唔好比較！」Janet認為人人皆有其獨特之處，「或者佢有好多好叻嘅地方，你要觀察，你要俾時間佢。」Janet拒做虎媽，對兒子們的興趣和發展，採取「積極不干預政策」；她指快將生日的長子TJ盡得爺爺洪金寶的武術細胞真傳，年紀輕輕已展示出耍兵器的天份，媽媽承諾送雙節棍作為其生日禮物。
與其上心 不如放下
「樂觀正面」Janet總愛掛在口邊，但作為公眾人物，尤其面對負面新聞，是否如此容易「 take it easy」？Janet坦言初入行時曾為此哭過；初與天明拍拖時，對方甚至着她別看娛樂雜誌。日子久了，她漸漸領略到「It just a game！」作為娛樂圈中人，她明白到工作正是娛樂別人；只是諷刺的是，真相多不能成為娛樂他人的材料。慶幸，她參透出行內的遊戲規則，更學懂放下。Janet聳聳肩：「冇辦法，做返好自己咪得囉，唔需要理人哋點講。」就算兒子將來接觸到這些負面新聞，她也不迴避，「 咪照事實同佢講囉，又冇乜唔俾得佢哋知。最緊要冇嘢隱瞞，亦唔需要去猜猜度度，大家一家人。」
良心商人 先係成功
兒子的出現，讓她學習更多、發現更多。最近創立的天然護膚品牌，跟「愛」都有所關連。當上媽媽後，對健康更為注意；尤其她本身患有濕疹，加上近年出現不少化學添加的負面報道，令她對天然用品更為堅持。
由最初學香薰精油作自用，至其後推出產品發售，她發現了最大的得著，「原來做落先知可以幫到人！」她堅持自行調配及親身試用後才推出。「我送好多嘢俾朋友用， 我想大家用到我啲嘢係開心嘅，最多加天然精油，唔會加藥性入去。好多化妝師都話我哋其實可以賣貴啲；但我係想多啲人用到、感受到，多於我哋想賺錢。」
「我哋真係落足真材實料，因為就算呃到人，都呃唔到自己，做一個有良心嘅商人，先至成功，個成功就係大家嘅口碑！」她曾經歷過半夜摸黑幫兒子「換唔到片」時的「忟憎」慘況，便設計了方便父母「換片」的魔術貼BB衫。Janet希望，做生意的同時，還能以方便及幫人的心態作出發點。
只要每日做好自己
事業、家庭，各取得平衡，她不諱言「係好幸福、係happy family」。但她仍自覺「成功」還有段距離，「 我唔敢講成功住，每一日喺度學習緊。冇話成唔成功嘅，只要每一日做好自己要做嘅嘢囉！」
美貌與智慧並重，也許不只是香港小姐的口號；還當是這位全能媽媽的寫照。
