pgview
/CheckIfDuplicatedEmail
/Lang

黃夏蕙 - 善良是最大信仰

台上,她一直演著「標奇立異」的角色,卻沒一個代表作。
台下,她貼地做自己、我口講我心,卻深入民心,人氣高企。
現實中,她的成名作,是真正演活了「黃夏蕙」自己。
 

 

相約夏蕙 BB 做移民美國前的最後一個專訪,Lifewire 團隊率先到路邊「迎駕」,甫開車門,BB 如女皇出巡般,自然地遞上玉手,小編隨即上前攙扶,不敢怠慢。「BB」駕到,總不令人失望,三排珍珠粗項鏈、閃片釘珠波點裙、四吋鬆糕鞋……


「夏蕙 BB」、「BB」……沿路歡呼聲不絕,連隨拍照聲此起彼落,她總以親民的微笑和揮手回應,被邀合照更是來者不拒。短短兩段電梯的腳程,小編見證着這廣受愛戴的畫面。

 

過往,她曾被標籤成「標奇立異」、「攝石人」,但她從不介意他人目光,更以行動展示自己關心社會和年青人的「貼地」一面,漸漸地,從負評中走出,「嗰個整容怪」一步步成為大眾口中的「夏蕙 BB」,贏得網民支持。

 

 

頭炷香 KOL 娛人娛己


「我係佢fans嚟㗎,年年都有睇佢裝頭炷香!」如許多人一樣,其中一名罕病童家長對她最深的印象,是每年年三十晚穿著千奇百趣的裝束,到黃大仙廟上頭炷香。BB卻指其實無心插柳:「本來我係唔會著呢啲衫嘅。但因為啲香咁粗又咁高,啲人一早就揸住點著晒嘅香,燒到頭髮呀乜嘢都冇晒,假髮都俾人扯埋出嚟,眼水係咁流,等到裝頭炷香時,已經花面貓咁!」


2003年後,她開始戴帽和眼鏡上頭炷香,後來突靈機一觸,按不同生肖年份設計不同造型配合,「譬如猴年我又扮到成隻馬騮咁,啲人幾開心呀,我自己又好開心喎,所以每年都趁住節日悉心去做。」旁人的嘲諷和批評,她毫不理會,堅持做自己,成功走在潮流尖端,更成為香港人寵兒。

 

 

無分宗教 一心向善
 
BB說,自小已跟父母參拜黃大仙,但小時候在天主教學校讀書,雖沒有受洗,但信奉天主教。「嗰陣時我好恨有細蚊仔,我喺天主面前講一句:『如果你畀我生咗個BB,不論仔女都好啦,我就會將我個BB信奉天主教!』」與胡百全誕下長女後,她遵守諾言,帶長女受洗。
「咩教都好,出心係向善㗎啫,去信乜嘢教都係善心、係幫人。每次求黃大仙,我都希望世界和平,人人有飯食有屋住。」BB指自己不能把對黃大仙的信奉轉移至其他宗教,但遇上不同人邀請她參與公益活動,她都會毫不計較幫助有需要的人。就如是次訪問後,她便為Lifewire的義賣活動免費宣傳,更不時於社交媒體轉載Lifewire的罕病童訪問。

敢作敢為 愛得轟烈


提到BB的真性情,不得不提她與已故律師胡百全的一段情。當時正值花樣年華,與已婚的胡百全愛得轟烈,雖無名無份,卻為他誕下2女4男。


「個個都笑佢『不要(愛)江山愛美人』就係咁解!佢為咗我連行政、立法(兩局議員)都唔做,因為佢覺得需要時間陪伴我哋屋企。」生於名門望族的胡百全,是香港首位法學博士。作為華人精英的代表,

 


他於六、七十年代擔任立法局及行政局議員等公職。1971年,香港實行「一夫一妻制」,當時與有婦之夫一起的黃夏蕙,受盡冷眼。她形容,胡百全曾攜她出席上流場合,但其他名媛看不起沒有名份的她,胡百全最終甘願為她放棄公職。


「佢一生最愛係我!」從五十年代相戀,黃夏蕙成為胡百全「背後」的女人逾半世紀。雖不被世俗接納,卻深深感受到另一半對自己的愛,「只要嗰剎那對我好,唔離開我,我覺得名份乜嘢都唔重要。」

 

千方百計 為見最後一面


這段錯綜複雜的關係,未有隨着胡百全元配在1995年離世而解結。胡百全晚年因健康惡化需留院休養,BB原本每月收到的家用被中斷,就算想到醫院探望,亦被其正室子女多番阻撓,後來更被法庭頒禁制令禁止她及子女探訪。

 


「當佢入咗醫院,佢哋(正室子女)就困住佢,唔俾佢出嚟,電話都唔俾佢打。」日有所思、夜有所夢,一晚黃夏蕙夢到胡百全,她認為是他報夢,希望能見她一面。她想盡辦法,甚至打動在醫院工作的清潔姐姐,趁看守病房的守衞外出午膳時通風報信,始能見到病重的胡百全。


「我上去推埋道門,見到佢喊、揸住我手,叫我『放心啦唔緊要,我一定會照顧你屋企,照顧你仔女嘅!』」黃夏蕙著他不要擔心,只需要好好保重身體,但說不到幾句,胡百全的兒女已經回來,這也是他們兩人最後一次見面:胡百全翌日離世,但子女封鎖消息,就連訃聞也是落葬後才登報。

 

陷入低谷 為情自殺 

「我為佢離開咗好多嘢,去過修道院,亦自殺過。」愛情難分對錯,但成為第三者,黃夏蕙自覺是胡百全的負累,曾把心一橫:「唉,一了百了啦!」
 
「佢犧牲太大,我覺得如果我一日喺度,佢個家庭就會嘈得佢好交關。如果冇咗我,佢屋企唔會嘈啦,我啲仔女佢會照顧嘅……」
 
她又一度到修道院「逃情」,被安排到醫院照顧患病嬰兒,但每朝跪拜時卻總是想起他,也被他每晚來電挽留,結果始終逃不出這段情。胡百全撒手人寰後,她更陷入絕望。

 
 
 
「柳暗花明又一村」
 
「我最記得我求一支籤係喺大嶼山大佛,嗰時我最深刻,我先生走咗,我乜都冇晒,我就避上去住幾日。我求咗支最盡嘅99號籤:『柳暗花明又一村』。籤係最唔好嗰支,但係解籤嘅時候係最好嘅。」
 
籤文令她醒覺人生仍有希望:「我有好多責任,有好多嘢要做,點解要將自己嘅生命犧牲呢?我又冇做錯嘢。」她自言,自從胡百全過身,她就不屬於任何一人,而是屬於社會,遂致力參與慈善工作,「只要肯努力去做自己應該做嘅嘢,人生係唔會有盡頭,所以我捱到今時都記得呢支籤。」

 

就像這趟訪問後,她便義不容辭為Lifewire的連串活動宣傳,除了希望為罕見病兒童籌募醫療開支,經理人小肥豬Simon更在網台節目開拍一系列專輯,訪問罕見病個案,讓更多人知道他們與病魔搏鬥的故事、照顧者的點滴分享。Simon還身體力行為Lifewire年度活動【愛跑 ‧ 東涌呀】籌款。

 

離別在即 難捨香港人情味

 


這次訪問在以荔園為主題的餐廳拍攝,勾起夏蕙 BB不少回憶。出道時曾演粵劇的她,與年紀輕輕便已登台賣唱的梅艷芳等人,在荔園留下不少足跡:「嗰時梅艷芳、呂珊、薜家燕都好細個,就同佢哋一齊嚟表演,嗰時好開心㗎,亦唔知佢會成名。嗰陣時我就已經好錫、好鍾意佢哋嘅,而家佢哋一個個都成名;睇住佢哋大㗎!」她指至今與呂珊等人仍是好友。

 

在訪問後約一星期便要離港的她,坦言最不捨得是香港的朋友:「唔捨得人情味,我啲朋友、親戚、仔女都喺香港,仲有香港嘅風景各樣都好好!」

 


 

 

樂天依然 愛被稱「BB」


隨BB拍攝近一天半,令團隊啼笑皆非的,是這個年逾九十的高齡BB,貪玩得常跟小編「咬耳仔」:「有party記得call我!」。還有就是一身「登台 look」,卻不介意大熱天時到街邊小店,吃一碗30多元的牛腩粉,且對要求合照的街坊來者不拒。然而,最令團隊回味的,還是與Simon互不留情面的無間斷「有味」互窒。


「我覺得『夏蕙BB』(的稱呼)好適合我,因為我有時都好幼稚、好似BB咁天真。BB仔呀嘛,係唔會有蠱惑嘢、個心好善嘅,唔會去害人。咁我覺得自己係一個BB咁樣,好開心㗎!」若說夏蕙BB的演藝生涯缺乏令她爆紅的代表作,也許,這份真誠善良、平易近人的性格,才是她人氣高企的生存之道!


採訪、撰文:蕭愷智、梁劍紅
編審:陳偉麒、梁劍紅
攝影:Sea.Pho.Yea、Mak C.Y.
鳴謝:Good Show TV、荔園.流金歲月主題餐廳
View Comment (0)
You must be a logged in contributor to comment.