年僅18歲便奪得「香港小姐」冠軍，李珊珊的起步與「美麗」劃上等號。高峰時為慈善拍攝性感寫真，低谷時也走過情緒病康復之路，外貌和體態或許不復當年，但從苦難磨練出的靈魂，卻為李珊珊的美賦予更深層意義。
何謂「靚」
「一定係金城武最靚仔！」李珊珊拋出這個「膚淺」的答案作引子。「靚來說，官能刺激是第一樣嘢；但如果再大啲，係靈魂。一個人嘅靈魂就好似一本書，如果你得一頁，我15分鐘睇晒就冇意思。」她形容，其實每個人邊活邊不斷親手寫下自己靈魂之書。
由30年前一張白紙般進入娛樂圈，寫到現在48歲，「究竟我本書有幾厚，其實都係睇自己願唔願意去感受呢個世界、去交朋結友。我而家會覺得，有趣嘅靈魂先叫靚，係我而家追求嘅嘢。」
淡然看患病 慶幸找到答案
「病」是她這本書裏的重要章節，「好重要，佢霸咗我十年喎」：走過壓力爆煲、驚恐症折磨、外型大改變。「其實人生真係會有生病嘅時候，不過可能係我提早咗，或者時間比較長。」
由讀書時期瘋狂玩運動，到後來選美，拍劇，拍電影，拍拖…不斷的忙碌貪玩，「三十至四十歲突然覺得自己太奀皮，我都係要靜一靜啦」，由極端去到另一個極端，「靜一靜之後，就開始病」：會突如其來上吐下瀉，「嘔到好似新加坡隻魚尾獅噴水池」、呼吸困難、心跳加速、冒冷汗、休克，陷入瀕死的感覺約45分鐘，每次發作後，虛弱得要留院數天。
她看遍腸胃科、心臟科等，都找不出病因，「我哋成日覺得，咩病都會有答案；但原來有時只睇到佢個徵狀，但確定唔到起因」，「究竟發生咩事呢，徬徨、煎熬，係精神折磨。」
走過不少罕見病人經歷過、找不到答案的惶恐，糾纏兩年，終於發現是患上精神科的驚恐症，她形容當刻感覺是「如釋重負」，「終於都知道喇。食咗藥真係控制到個情況，開心都嚟唔切，我覺得感恩」。
患病對她來說，是認識自己的過程。自言「少咗一條筋」的李珊珊，會留意自己食藥後的反應，「食精神科藥物，唔係一食就中（有效）㗎，食嘅份量、唔同藥廠，效果都會唔同。做病人都有責任，記得每一次好好表達畀醫生聽，你食藥有咩反應，醫生才知要點樣幫你調配（配藥）。」
朋友重要過金
過去10年，她逐步適應，由有病慢慢醫，然後適應怎樣過活、怎樣銜接社會，「唔係一年半載嘅事。想勸喻照顧緊情緒病者嘅人，你要知道，呢個係一個希望工程，絕對唔係一天或者一年就得。唔好定目標，最怕你定目標，譬如話我三個月要達到啲乜嘢，唔好唔好，係要留意住嗰個人嘅精神狀態去配合。」
「個天唔會因為你病，而唔畀人生考驗你；個世界唔會因為你病而善待你」，「如果無朋友嘅精神支持，我估我行唔到今日。因為情緒病患者對於有人聆聽或者陪伴，係非常之重要，可能重要過你擺低舊錢畀佢。」
堅強，不代表要逞強
「堅強係要，但係唔好過份堅強，或者成為拒絕別人幫忙嘅理由。中國人成日講『打掉門牙和血吞』，我哋就係喺咁樣嘅環境長大。」她認為這種觀念，令情緒病患者「死頂」，所以當她見精神科醫生時，醫生發現她的驚恐症已達中度以上級別。
開設網台分享經歷 打破情緒病誤解
她形容從高峰淡出幕前、靜下來的這段日子是「休眠期」：「好似捕魚(休漁期)咁樣，都係整個人嘅沉澱」，透過互聯網接觸世界。2024年9月，「休眠期」後的李珊珊，決定開設YouTube頻道《三座山 Mount Trio》：「成個構思、成個理念，其實真係因為情緒病開始。」
請來了當年診斷她患上驚恐症、後來邀請她擔任精神健康大使的精神科醫生劉英傑擔任節目嘉賓。她坦言，每個情緒病患者狀況不一，她走的路不一定適合其他人；但至少自己身先士卒講出來，讓病友們多一個同行者，也打破普羅大眾對情緒病的誤解。所以當「護‧聯網」邀請她分享患情緒病經歷，鼓勵罕見病患者和在照顧壓力下患上情緒病的家人時，她也迅速答允。
「我唔係咒大家，但在座都有『潛力』，或者遇過挫折有機會患上情緒病。咁我走出嚟，令大家唔好覺得患情緒病唔應該講出嚟，大家係咪可以行少啲冤枉路呢？」
無懼體態被抨 幸得網友支持
「未決定重新見天日嘅時候，係有焦慮嘅。」回到幕前的李珊珊，坦言已盡力控制健康，惟因甲狀腺功能低下、服用類固醇導致身形改變。開台前，她與朋友和同事開會，推測外間對她復出的反應，也討論她能否接受海嘯般的評論和留言。
「開頭行出嚟諗住死梗咁滯㗎！但後來見到，大家鼓勵嘅比例係9比1，真係好感恩，多謝都嚟唔切」。
「如果觀眾覺得(節目)好睇，係一個肯定，我就好快樂㗎喇！有一集同陶大宇嘅（直播），個個都話笑到黐咗線！其實娛樂唔使要咁多使命感，我最緊要令你嗰個半鐘頭快快樂樂笑咗出嚟，就夠㗎喇！」
除了娛樂觀眾，最令她滿足的，是收到情緒病患者的留言和鼓勵。「讓佢哋有個地方將感受講出嚟」，「想畀佢哋知道，我哋一齊行緊，我行到你都行到。」
