「喺北京嗰幾年，因為我夢想係拍戲、成為大家認同嘅演員，所以就算去做洗窗、喺酒吧洗杯維生，我一啲都唔覺得慘，因為呢啲只係我追夢嘅中途站。」以偶像身份出道，備受力捧的李日朗；卻選擇北漂由零開始，就是為了追尋自身價值。事業上軌道之際，不幸遇上疫情、患癌，看似把一切沖毀，但原來為豁亮的下半場埋下伏線。

今日，他不用飾演別人偶像劇中的陽光少年，只願擔綱自己用雙手追夢、築起的小顏術事業，感覺更踏實、自在。

斬斷娛樂圈五光十色的情絲

今次訪問在43歲李日朗（Don)的小顏術專門店進行，甫踏進去，身穿啡色制服的Don熱情迎接，看着他忙於工作、提點員工，不久前更在《日式小顏術大師挑戰賽》，擊敗來自全球30位高手，勇奪冠軍；放下明星光環的他，臉上反添了一份滿滿的自信。
 
Don 2003年推出首張迷你專輯，並演出TVB偶像劇《當四葉草碰上劍尖時》，憑着陽光男孩形象人氣急升，歌影視三棲。
 
「(當時)唱一隻歌，笑一笑，打個招呼，好多人為你鼓掌，這種莫名其妙的虛榮感，好開心。」但幸運之神眷顧總有期限，Don人氣開始下滑後，人情冷暖，點滴在心頭。
 
「當時我向一位電台DJ 抓撈，問可唔可以播我嘅歌？可唔可以做節目嘉賓？ DJ話，拍劇都幾啱你吖，不如你返去拍劇啦！」「我去電視台問監製，可唔可以安排我拍劇？佢哋又會話，你係唱片公司嘅人，好難搵你拍劇喎！咁我話不如幫你唱主題曲？佢又話，而家電視台都有自家歌手，好難搵你唱！ 」

災民啟發 改寫人生課題

這些推搪婉拒令他明白：「人家不用你，有千百萬個理由。 但只要你人氣夠，有自身價值，即使你走到天涯海角，人家也會找你(工作) 。」

2008年四川汶川大地震後，他到災區幫手，看見當地居民依然開心自在，大惑不解，不禁跟其中一位叔叔說：「你哋唔使強裝開心㗎，你哋有權唔開心，唔使怕連累人。」

然而，對方卻說他們雖一夜間失去所有，但他們掌握種植的方法，只待天氣好轉，便可以種回來。「我覺得好震撼，佢哋開心就係因為佢哋心裏有底，佢哋知道成功嘅方法。」

對於當時正憂慮一旦唱片公司不續約，前途如何的Don來說，如當頭棒喝，「之後我嘅課題就變咗：我要搵我自己嘅能力。」

北漂闖蕩：瞓一年幾梳化  只為一個機會！

2009年，Don隻身到北京磨鍊，尋找自身價值，「喺北京，一切從頭開始，自己印履歷送去劇組，用好爛嘅普通話介紹自己，對方聽到皺晒眉。」「日頭去Casting，夜晚幫人抺外牆洗窗、喺酒吧洗杯，喺朋友屋企瞓咗一年幾梳化，就係等一個機會！」
 
但他已經自覺幸運：「隔籬一齊排隊casting嗰個演員瞓緊地牢，每月250蚊床位，冇窗嘅，每朝喺公用廁所刷牙。北漂嘅演員，每人都有一個夢想，自問點解人哋得你唔得？」
 
捱了10個月，終於有劇集找他演出，他跟著劇組穿州過省，一部接一部，鑽研演技，後來網絡電影興起，他一嘗導演滋味，2018年更憑自編自導自演電影《特區》，在《中韓國際電影節》獲頒最佳新導演獎。

疫情來襲 努力化為烏有

以為否極泰來，然而，2020年疫情無預警來襲，投資方撤資，這位新晉導演無戲拍，也漸被人遺忘。
 
當時內地流行網上直播賺打賞，Don為生計也投進去，「每晚至少直播4至6小時，問觀眾想聽咩歌？開口叫佢哋打賞，送車、送火箭、送公仔......因為全都可兌換成錢。最初過唔到自己嗰關，講唔出口。我覺得做乜啫？ 街頭賣唱？ 直至有一日我突然講得好順口，我就知道，我已經可以為生活放下身段。」

發現胃癌：負擔唔起醫療費！

難關捱過一個又一個，2023年，他更患上癌症。「突然有一日關節痛，我以為痛風症發作，但食咗藥一個禮拜，都仲未好轉，早上腳踭痛，午後變成膊頭痛，我覺得奇怪，係咪撞到污糟嘢？」朋友建議他驗血，才發現胃癌指數超標三倍。
 
「喺香港醫癌動輒幾十萬，當時我只得一份旅遊保險，我真係負擔不起！當時心想，既然畀唔起，不如開開心心度過餘下日子。」朋友介紹他一位博士，稱正進行中藥抗癌臨床研究，不收費，阿Don決定當「白老鼠」，日飲2公斤中藥，三個月後，他再次驗血，發現胃癌細胞指數、尿酸、三高奇蹟地全回復正常。
 

父母接連患病 一周花掉20萬元

然而兩年後，輪到父親患癌、母親腿部半月板撕裂，令阿Don壓力爆表，一周花掉20萬醫藥費。「我們家報喜不報憂，父親患癌的消息，我也是從保險經紀口中得知。」
 
幸好父親接受治療後病情穩定，母親也漸康復，令他鬆一口氣。

開創人生新跑道 助人自助

當上天為你關上一扇門，會為你打開另一扇窗。阿Don成功抗癌後出現臉歪後遺症，四出求醫也未癒，最後透過「小顏術」矯正，他於是到日本拜師深造，三年前開設診所，越做越大，更宣佈退出娛樂圈，選擇用雙手幫客人重拾信心。
 
「有一位60歲女士，天生眼睛像一條線，因為看見我喺YouTube講，可以透過小顏術整大眼晴，便上來試試。佢完成療程後，望著窗外喊，我問佢咩事，原來今次係佢60年來第一次可以同時望到天和地！那一刻我好震撼，原來咁平凡嘅幸福，唔係理所當然。」
 
一位兔唇的女顧客，被結婚廿多年的初戀丈夫拋棄，「離婚時，老公話自己被朋友笑咗20多年，因為太太有兔唇。」她自信盡失，兒子帶她上來求助。當時她戴著口罩問：「阿Don，你成日同啲客講，你咁靚，唔駛整啦，但如果生得太醜，你係咪都唔會整呀？」
 
「當時聽佢咁講，我就知佢好自卑，心裏好難受。」做完療程後，婦人稱心滿意，離開時一時忘記戴回口罩，當Don提醒她時，她反問：「阿Don你覺得我駛唔駛戴口罩？」此話令他知道對方開始重拾自信。
 

娛樂圈外的另一種風光

他的小顏技術近日更在國際賽中獲得肯定，「呢三年我冇放假，日做6至8個客人，我三年內可能做咗人哋十幾年嘅量」，「(這份成就)我相信還有上天恩賜，所以我應該把握呢項技術，幫助更多人。」
 
他指着左手移位凸出的手指關節：「我呢個關節係『做骨』做到勞損，凸咗出嚟，我成日要幫佢消炎、移番佢入去，呢啲係我努力得返嚟。」這份損傷，在他眼中卻猶如一個勲章、一份用努力換取的榮耀。
 
尋尋覓覓，阿Don 感恩找到夢想，「我鍾意呢份工，我鍾意憑手藝做完客人後，笑住咁送佢走，我係真心，我賺咗囉。」
 
他看着今天的自己，更充實、更快樂，「以前成日憂慮，我拍完呢部戲，下部幾時有人搵我呢？出完呢隻唱片，下隻有無人買？如果唱片公司唔同我續約，我係乜？ 有乜本事繼續生活下去？ 而家我終於唔駛靠人，靠自己一雙手，旅居也好，到哪個國家也好，只要有人有面骨矯正嘅需要，我都不用擔心生計。」
 
比起娛樂圈，他說現在是另一種風光，「當然唔係日日喺報紙、電視出現，而係幫到人，佢哋覺得開心，然後跟其他人分享，我覺得我依家風光㗎！」

給病童家屬的話：希望在明天！

走過人生高山低谷，患過頑疾，現在又是父母的照顧者，阿Don體會到罕見病兒童和家人、照顧者的感受，說出口的不是含糊的加油，而是具體的祝福和目標：「科技日新月異，醫學發展速度已是從前三五倍，加上AI發展迅速，所以你哋唔好放棄，你們捱過一日，明天就會有新希望！  」
 
給罕見病童的話：順住逆境 堅持追夢！
 
他鼓勵罕見病兒童堅持夢想，「對任何人嚟講，追夢都係難，無論你有病、冇病都係難，難唔難係視乎你嘅夢有幾高，所以順住呢啲困難繼續前行啦！一定會有新出路！ 」

採訪、撰文：陳偉麒、梁劍紅
編審：陳偉麒、梁劍紅
攝影：麥超億、Sea.Pho.Yea
影片製作：Lifewire、麥超億、Sea.Pho.Yea 、鄧欣
部份照片由受訪者提供
場地提供：小小堂