pgview
/CheckIfDuplicatedEmail
/Lang

當李亞男遇上...他、她、他

「我嘅行動雖受限制,但我思想同列車同步!」
「無論晴朗定狂風雷暴,我都想提醒市民!」
「你擁有本身嘅能力,請相信自己!」
時而英雄聯盟、時而天氣報道,時而軌道疾走!

她是陪着病童追夢的「愛跑大使 」----  李亞男。

「劉醒,你係咪呃緊我啊?」李亞男(Leanne) 於電視劇《老表,你好hea!》的經典金句,一度成網上搞笑熱話,更受網民熱捧:「李亞男淨係憑呢段都應該拿女配角!」事實上,她確曾於其他劇目獲最佳女配角提名。今天,卸下2005年國際華裔小姐后冠的光環,這氣質美女更耀目的,是懂得感恩的知足、不斷學習和分享,不計回報的善心。

 
 四年前成了王祖藍太太,去年底再「升呢」為人母;囡囡Gabrielle的降臨,讓倆口子 的愛再推至另一層次。祖藍與Leanne將囡囡百日宴的所有人情捐贈Lifewire《護.聯網》,幫助患上罕見病的小朋友義不容辭;Leanne更身體力行,一口答應任「愛跑大使」,為Lifewire的年度活動【愛跑.城門河】宣傳,希望更多人參與,讓更多人了解罕見病。  
     

三個病童  三個夢想

初為人母,且工作繁重,但Leanne仍堅持抽空兩天,與Lifewire三位病童朱逸朗、陳梓鍵及謝梓熙 (Sophie) 齊齊拍攝【愛跑.城門河】微電影,齊齊追夢。三位病童,各有不同的身體狀況、各有小小的大夢想,各構思出三個故事;關於列車的、關於天文台的,關於拯救世界的……

 「Leanne姐姐,你識唔識玩呢啲?」「你知唔知我鍾意咩?」「我畫呢個靚唔靚?」「不如我改呢句對白!」一起吃飯盒、一起NG、一起唱歌、一起猜「包、剪、揼」……當Leanne遇上三位小導演兼小演員,過程就是笑聲、笑聲,還是笑聲……

經過一連三集的「對手戲」,Leanne完全被他們所感染:「我覺得佢哋係一班好可愛、好活潑、好被愛嘅小朋友,佢哋好有理想、好熱情,對生活充滿熱誠;喺佢哋身上,我見到好強嘅正能量,無論遇到咩困難,佢哋都咁正面。」

 

自信認真  適當Let go

「Sophie好容易同你傾偈,好容易熟,唔怕陌生嘅。」「朗朗一嚟就話『我要唱紅日』,咁就成首歌唱晒出嚟,佢係一啲都唔怕羞嘅。」「梓鍵好有創新天份,佢畫畫好叻,佢畫火車時畫得唔夠似,好似有啲懊惱,我覺得佢係一個對自己要求好高嘅小朋友。」

 從三位病童身上,Leanne看到了值得學習的地方,就是認真的態度和自信,「見到佢哋好有信心、好有自信企出嚟,好開朗。可以睇得出病童都好似其他小朋友一樣,冇咩大分別,一樣擁有嗰份童真!」

 拍攝過程中,部份場地涉及梯級及高台,團隊格外緊張攙扶甚或抱起他們,反之家長
雖感吃力,但仍從容面對;Leanne不諱言有一番體會:「見到病童家人唔會因為小朋友有特別需要,而過份緊張或者過份呵護,都好Let go (放手),由得你做,只係默默企起隔籬支持,睇住佢哋行每一歩路。我覺得病童嘅家長都值得我學習,適當時候都要Let go (放手)。」

     
      

加深了解 標籤化解

「佢哋有醫藥費上嘅壓力……仲有被歧視、被標籤嘅壓力。」短短兩天的拍攝相處,Leanne已感受到病童家庭的苦況;她努力演活病童作品之餘,亦主動與家長交流,盼加深對罕見病的認識。事實上,罕見疾病有別於普通疾病,醫療費用動輒數百萬一年,十分昂貴,非一般家庭能夠應付;她希望善心人士能捐款幫助病童家庭,減輕其經濟負擔。

因為罕見病,他們在行動方面可能有異於他人,外出時可能要面對很多不同的「眼光」。「要化解呢啲標籤,了解係好緊要嘅。所以我希望透過同朗朗、梓鍵同Sophie嘅合作,令更多人了解罕見病,希望幫佢哋同家人帶嚟更多力量、體諒同支持!」

她  跌落凡間的天使

幸福不是必然、健康也非必然;初為人母的Leanne,跟病童家庭相處過後,體會自是更深。事實上,Leanne隨心而發的,不僅是那股幸福的氣場,還有發自內心的珍惜、知足與感恩。「上帝畀我嘅禮物,冇諗過有一個咁美好嘅家庭,包括爸爸、媽媽、妹妹,大家都好好,冇乜特別拗撬,好和諧,我希望可以一路咁樣落去,到老都係咁。」

 上天贈Leanne的禮物,確可讓她如數家珍,惟最令她著迷的,還是  XX     的小天使!囡囡Gabrielle可瞬間令媽媽化身小粉絲,隨時隨地和大家分享偶像「肉照」,還不禁狂loop「佢好得意㗎!」這位知足媽媽自言「我係一個都幾簡單嘅人,即係我都幾容易開心嘅。囡囡係祖藍首歌咁《跌落凡間的天使》,而老公就係上帝賜畀我嘅禮物。」

 

幸福心法 分享學習

不斷學習和分享,是Leanne和祖藍留住幸福的心法!「我哋要學習點樣將自己有嘅嘢,分享畀其他人,呢樣嘢我哋要學習。」這不僅是她和祖藍二人的人生課題,也期望Gabrielle將來可跟他們一起做義工,分享愛,「令佢知道原來自己係身處一個好幸福嘅家庭,好幸福嘅環境,要佢學習好多嘢都唔係咁容易得到嘅,要學習share (分享),學習點樣對人。」

 「而家喺屋企玩得比較多嘅係囡囡啦,佢係我哋嘅玩具。講笑!」Leanne笑言,囡囡是夫妻倆的精神食糧;「返到屋企第一時間就係洗手跟住同佢玩小遊戲,扮動物叫…等,跟住就會影低佢!佢有時都好好笑嘅,影低等我哋出去或者工作嘅時間就係咁睇嗰啲片,係我哋嘅精神糧食。係好緊要嘅!」

     
   

暫棄夢想  全職湊女

那小公主有否遺傳了父母的演藝基因?「其實佢有啲Cool嘅!佢幾似我哋兩個細個,都係比較文靜啲,唔係話好活躍,成日都唔笑嘅。我哋要扮鬼扮馬,真係要用好大嘅努力,佢先會笑兩下『哈哈』,跟住就收返,都幾吃力嘅!」

 若囡囡將來對演藝圈感興趣,Leanne表示不會阻止。「我哋唔會限制佢一定要學幾多樣嘢,或一定要成績點點點;重要係佢可以發揮自己鍾意嘅嘢!」Leanne不諱言,現時大部份時間主要是照顧囡囡,不會全職工作,「等佢大個咗,唔需要我睇到佢實一實,先去諗再追求自己嘅夢想…」

 「老公話一係生兩個,一係四個,一係六個囉,就唔可以三個,因為中間嗰個會被忽略;咁我諗就兩個先啦,唔好生個足球隊住。」Leanne坦言沒特別期望,只盼囡囡健康成長,做個快樂BB,但不會縱容,「教佢道德上嘅嘢緊要過學歷上嘅,點樣對人呀,點樣學習share,甚至會教佢點樣做家務;即係唔可以咩都唔做!」

 

    
     

新婚體會  不再遙距

雖然忙湊B,但倆口子沒忘初心;常製造甜密回憶,「幾忙都一定抽時間拍拖;每年結婚周年會特別安排慶祝或出埠,我唔會忘記特別日子。」祖藍亦會費盡心思,「佢都經常氹我開心㗎!例如追我時帶我去過我唔識嘅地方,要轉藍色的士上山嘅,拍拖10周年佢就帶我重遊拍拖舊地,上次蒙住眼去,今次佢話要我大開眼界,睇下自己究竟去咗邊。其實佢有好多好浪漫嘅計仔嘅!bb出世佢都唔會忽略我,令到我都好放心,即係可以放心生多幾個!」

 提起袓藍,Leanne總是笑不攏嘴,但回想新婚時刻,有甜,也有苦。「新婚後佢因為要拍戲,所以走咗好長一段時間。」她還因而情緒低落,「我哋發覺原來唔可以離開太耐。」此後,二人取得共識,盡量接香港工作,縮短離港時間,「或佢嚟探我、我去探佢,大家配合啦!」

 相遇、相愛,相處,一點也不易。他倆經歷過多年離離合合,故對這段感情特別珍惜。「好多夫妻因好少事嗌交,跟住就傷害對方嘅感情。我哋會讓下對方,好少為一小事唔開心,唔會亂發脾氣。」

 「夜晚有時間會多啲傾偈,多啲分享大家出面遇到嘅嘢,或者困難,同埋我哋習慣一齊禱告。」除互相磨合和遷就,Leanne以「坦誠交流」總結夫妻相處之道。

 

 

 

 

 

 

 

【愛跑.城門河】微電影

                               病童原創  VS  李亞男演繹

                                                                    小導演有話兒  x  3

今年【愛跑.城門河】找來三位病童,創作他們與夢想的故事,由構思、畫Story Board,以至攝製成影片,他們均全力參與,並與「愛跑大使」李亞男 (Leanne) 擔綱演出。

《由晴朗的一天出發》

編、導、演:朱逸朗(10歲)   黏多醣症六型 

     
     
小導演小資料

10歲的年紀,6歲的個子。朗朗因體內缺乏了某種酵素,令黏多醣累積,影響細胞和關節,造成身形短少及關節僵硬,致脊髓凸起帶點內彎,短小手指難以發力。不足一歲時他進行了臍帶血移植手術,一度徘徊鬼門關。醫生評估,十多年後有機會自行排斥移殖而來的物質,眼睛、骨骼、心臟等各方面有機會轉差,回復到手術前狀況。
愛跑.故
朗朗終於實現天文台長夢!內容講述李亞男到天文台應徵天氣報導員,初嚐男主角的朗朗則飾演的天文台台長,並跟她進行面試。這位應徵者表現如何?最後能否過關獲聘呢?
愛跑.夢
朗朗的夢想是成為天文台台長,希望透過報道天氣狀況,來為市民服務,不論狂風暴雨或天氣晴朗,讓市民出門之前獲得最準確的天氣預報。
愛跑.想
這次親力親為製作屬於自己的故事,朗朗表示「都有啲辛苦,熱死人喇!(拍攝當日高達34度),最辛苦係不停重重覆覆咁錄囉。」這麼辛苦值得嗎?他眼神堅定地說:「值得!唔單止可以完成我嘅夢想,仲可以籌款幫助病童。」朗朗亦會參加【愛跑.城門河】,更定下目標連續跑到3公里!「命運就算顛沛流離、命運就算曲折離奇…」誓要突破自我的朗朗,說罷又忘我地唱起飲歌來了。
愛跑.趣
「好開心!」(點解嘅?) 「見到明星吖嘛!」精靈佻皮的朗朗,總哄得大家爆笑。「我覺得咁樣講會好啲!」演而優則導的朗朗,還不斷於對白上提供意見,真的「天生食呢行飯」!首次見Leanne姐姐,他大讚:「做得好好呀!佢可以…好好咁講晒貓紙入面嘅字出嚟㗎!」他盼能再合作,更希望跟Leanne姐姐一起開派對,「(開party做啲咩?) 狂食嘢囉!」朗朗,不只你,我們也很期待喔!

《愛跑者聯盟》

 編、導、演:謝梓熙 Sophie(14歲)歌舞伎症候群

 
   
      
小導演小資料
 
「歌舞伎症候群」是先天性多重異常合併智能發展遲緩的疾病,患者主要症狀有特殊的臉部特徵、生長遲緩、智能障礙、骨骼問題等。出世已有心漏的Sophie,更出現Coloboma (眼睛虹膜缺損,會怕光及視力較弱),約一歲更發現盤骨移位、4歲還進行修復心漏手術。思想單純的她說話率真可愛,「我有Kabuki Syndrome;但我都係好開心囉。」
愛跑.故
在自創的漫畫故事中,Sophie化身擁超速跑力的女超人,聯同幾位好友組成英雄聯盟,誰知在危急關頭,超能力失效,令Sophie十分沮喪無助,他們最終能否完成拯救世界的任務呢?
愛跑.夢
「希望自己變成一個好healthy同好靚嘅女人囉。」右眼稍下垂及眼瞼外翻,走路時一拐一拐的Sophie,腳骨有嚴重扁平足,容易跌倒,難以跑步;她將夢想寄託在漫畫故事中,能健康地奔跑,四出救助他人!「我要諗我自己嘅故事,跑步嚟救香港地球!」
愛跑.想
這次,Leanne姐姐助她成就這偉大任務,Sophie的5人團隊都有特異功能,觸碰一下身體就跑得很快,但每天均失效一小時。一次,出發往拯救途中,碰巧異能消失;隊友Leanne姐姐卻提出很重要的啟示;最終,Sophie一句「我要相信自己!」解除了炸彈危機!「我哋靠個心嚟做嘢,最終係可以做到嘅!」Sophie就是想告訴大家:「不用怕,只要有善良嘅心,其實冇特異功能都可拯救香港,幫助別人。」
愛跑.趣
「清侵磨教叉燒包」,埋位前,Sophie總愛跟朗朗、梓鍵,還有Leanne姐姐一起畫畫及玩遊戲,「小明」、「黑白」……,無論任何角落,都會被其笑聲感染。未正式拍攝前,他們一起畫這故事,並對Leanne姐姐演繹其角色充滿信心,「我覺得Leanne姐姐會拍得好」。首次參與創作拍攝的她表現興奮:「好開心,因為見到朋友,好鍾意Leanne姐姐,可以一齊完成呢個故事好開心!」

《與列車同步》

陳梓鍵 (10歲)  杜興氏肌肉營養不良症

     
     
小導演小資料
 
梓鍵患上無藥可治的罕見病,病發率有五千分之一,肌肉會逐漸萎縮壞死,不只影響活動能力,更影響心肺功能;嚴重起來得依靠呼吸機。醫生曾評估患者平均壽命為18歲。前年認識梓鍵時,他仍能走路,不足一年,已退化得全靠輪椅代步。出入門口上輪椅,梓鍵雙手都不夠力撐起,每次只能伸出雙手要媽媽抱起。因着很多地方傷健設施不足,每次出門都打仗般「大陣仗」。
愛跑.故
「我雖然是一隻小蝸牛,但卻蓋掩不住內心對未來的希望及探索…」梓鍵原創的故事,其實更像一道心聲。
愛跑.夢
「我嘅夢想係做列車車長!」坐在輪椅上的梓鍵,熱熾地與我們分享其夢想。「因為可以載人到唔同地方,覺得好開心、好欣慰。」最初他覺得只有路軌的列車跟路面交通工具不同,很特別,故情有獨鍾,甚至不斷翻查資料,鑽研列車的一切一切。
愛跑.想
梓鍵從小就喜歡列車帶來的速度感,更讓其擴闊視野。「我的行動雖受限制,但思想與列車同步…」這幾句獨白,正正表達了輪椅阻礙不了小伙子的大世界,雖行動不便,但梓鍵仍能踏上沙漠,參與100公里賽事;「蝸牛與列車同步奔馳」,彷彿,不再是夢。
愛跑.趣
「畀多啲信心自己,總有一日會跑得過列車嘅。」就如他去年參加Lifewire Run《愛跑.香港仔》一樣,看似很難,最終卻能成功完成一公里賽跑。梓鍵回想起當日起跑時遇到小意外,惟並沒打擊他;今年,他眼神堅定:「Lifewire Run  我又嚟喇!」

Lifewire Run 2019 【愛跑.城門河】

它曾經臭名遠播,如今換上光環,成為居民淨化洗滌的聚集地,

它川流不息,貫穿大圍美林、車公廟、沙田馬場、            吐露港,

連綿不絶,連繫香港每個世代,

香港的好人好事,都印記在城門河上。

今年,一起尋回我們熟悉的城門河…

2019年,一起重新出發,【愛跑.城門河】。

【愛跑.城門河】慈善跑暨嘉年華
日 期:2019年11月10日
地 點:石門安睦街花園

愛跑之後……仲有愛玩

 

懷舊嘉年華

【愛跑】嘉年華今年共有十多個攤位遊戲,免費入場,懷舊玩意、驚喜禮物和特色小食,唔跑嘅你一樣玩至樂而忘返。
               
                      

「為誰而跑 」 真人集氣區

一眾跑手肩負了「為誰而跑?」的特別任務,讓病童們感受到人間有愛;病童亦表示要齊上齊落,一起參與,他們將會出現於真人集氣區,用她與他的故事感動你、激勵你,令大眾更了解不同的罕見病症。
                   
                   

人氣歌星演唱

當日將有人氣歌手到場演唱,激發全場熱熾氣氛,並以歌聲為一眾跑手打氣!

               
                      

傷健同行才藝表演

每個人都擁有屬於自己的才藝,除了歌手的演唱,更安排傷健人士的才藝表演,推動傷健共融社會!

昔日香港情懷打卡區

今年打卡區帶大家回到五六十年代的香港,昔日報章和日曆的設計,讓大家回味昔日印記。

               
                                     

獨家設計懷舊跑手紀念品

沙田友限量Tee    復古玩味 Tote Bag    沙田特色完成獎牌    香港地道經典毛巾

 

跑手證明

View Comment (0)
You must be a logged in contributor to comment.